De 7 anos en diante.

Desde a fiestra do seu cuarto, Ana ve pasar o tren todos os días. Un tren que nunca se para, porque onde ela vive non hai estación. Unha tarde o ferrocarril detense ao pé da súa casa e o revisor invítaa a subir, logo de que consiga descifrar unha adiviña. Ana descobre axiña que se trata dun tren moi especial: nel percorrerá os cinco continentes e, ao longo do traxecto, terá que resolver o misterio que encerran sete enigmáticas caixas azuis. Tras logralo, terá nas súas mans o Libro das Infinitas Historias, onde se gardan os máis fermosos relatos que homes e mulleres foron creando para axudarnos a soñar e a vivir. A intriga, a fantasía, o xogo coas palabras, a existencia dun planeta diverso e plural, o valor dos libros e das historias son os máxicos fíos cos que se tece este libro.